Misy karazany roa lehibe ny fametrahana teknika fampiasa, ary miankina amin'ny filàna, ny zava-misy ary ny fepetra na lalàna misy ny sadidy amin'izany.

Mikambana amin'ny tambazotra (On-grid)

Atohy amin’ny tambazotra raikitra efa mipetraka (JIRAMA ohatra) ny fametrahana ny takelaka sôlara ary lasa manampy ny herinaratra efa misy. Izany hoe toerana todin’ny tambazotra raikitra no ampiasana ity fametrahana ity. Kaôntera manokana afaka manisa ny habetsahana’ny herinaratra miditra sy mivoaka no ampiasaina sy ahafahana mamantatra izay anjara entin’ny takelaka sôlara teo amin’ny tambazotra (net meter na two-way meter). Io anjara entin’ny takelaka sôlara io dia “vidian’ny” mpaninjara herinaratra (JIRAMA ohatra).

Any amin’ny tany mandroso matetika dia misy fitsipika na lalàna mihitsy aza mamaritra sy mandidy ny fanohizana ny takelaka sôlara amin’ny tambazotra efa misy. Misy fenitra ny fitaovana ampiasaina sy ny fametrahana takelaka sôlara ary teknisiana mpametraka nahazo fiofanana sy alalana no mahazo manao izany.

Lafitsara

• Ny lafitsara mivantana dia resaka ekônômika: mihena ny sarany noho izy tsy mila bateria sy ny fikolokoloana bateria;
• Tsy misy very ny herinaratra fa rehefa tsy ampiasaina na izay mihoatra ny ilaina dia mikoriana mankany amin’ny tambazotra ary “vidian’ny” mpaninjara herinaratra mampiasa ny tambazotra. Vetivety araka izany ny mamerina ny masonkarena tamin’ny fividianana sy fametrahana ny vondron’ny fitaovana sôlara ary mampirisika ny fametrahana angôvo sôlara io fiverenan’ny masonkarena io. Mifanampy eto ny mpaninjara herinaratra amin’ny tambazotra sy ny mpanjifa manohy ny takelaka sôlara amin’ny tambazotra : ny mpaninjara mahazo herinaratra fanampiny azo zaraina ary ny mpanjifa mahazo tombony ekônômika;
• Lafitsara iray tsy azo tsinoavina koa ny fampiasana ny olika elektrika efa misy ao an-tokatrano. Azo atao miandalana koa ny fampitomboana ny isan’ny takelaka araka izay filàna herinaratra sy ny enti-manana.

Lafiratsy:

• Miankina tanteraka amin’ny tambazotra efa misy ny fampiasana ny herinaratra entin’ny takelaka sôlara eto: raha tapaka ny herinaratry ny tambazotra dia tsy ho azo ampiasaina izay herinaratry ny takelaka;
• Misy fepetra sy fetrany ilay “fividianan’ny” mpaninjara ny herinaratry ny tambazotra fa ny mihoatra izay ilaina ihany no “vidiany” fa tsy hoe mividy herinaratra amin’izay rehetra mamokatra herinaratra akory (trano mitafo takelaka sôlara nefa tsy misy mipetraka sy mampiasa ohatra).

Misaraka amin’ny tambazotra (Off-grid)

Mahaleotena tanteraka eto ny fametrahana ny takelaka sôlara saingy mila kosa fitaovana hitehirizana ny herinaratra tsy nampiasaina na mihoatra ny ilaina, dia ny bateria izany. Ampiasaina ity fametrahana ity amin’ny toerana lavitry ny tambazotra na toerana mitokana toy ny paompy fisitonan-drano, na koa enti-mandeha toy ny fiarandasy na sambo, sns.

Mila kajy marina sy antony matotra kosa raha toerana todin’ny tambazotra no ametrahana takelaka sôlara misaraka. Izany tokoa!!! Mety ho lafo lavitra ny saran’ny fitaovana sy ny fametrahana takelaka sôlara ary mety hoe ela vao tafaverina ny masonkarena raha taka-bidy ihany ny vidin’ny herinaratra entin’ny tamabazotra misy. Mety misy antony lehibe hafa kosa anefa manamarina sy mamporisika ny fametrahana takelaka sôlara na eo aza ny tambazotra misy, ny delestazy matetika sy maharitra ohatra.

Lafitsara:

• Hafa ihany ny mahavita tena, ary Ingahibe masoandro ihany iankinana!!! Tsy misy fiantraikany ny fahatapahan’ny herinaratry ny tambazotra amin’ity fametrahana ity.
• Tsy henony ihany koa izay fiakaran’ny vidin’ny herinaratry ny tambazotra satria efa fantatra sy voalamina hatrany ampiandohana ny saran’ny herinaratra sy ny fikojakojana rehetra.

Lafiratsy:

• Ny tsy fisian’ny tombontsoa ekônômika mivantana no tena lafiratsiny fa sady lafo ny saran’ny fitaovana noho ny fisian’ny bateria sy ny fikojakojana, no tsy misy azo atao amin’ny herinaratra tsy ampiasaina na izay mihoatra ny ilaina. Mila manana fiandry ihany koa raha sanatria misy fahasimbana ny singa iray na maromaro amin’ny fitaovana.

(*) Haibrida (hybrid)

Atambatra eto ny toetra tsaran'ny fametrahana on-grid sy ny off-grid: toy ny on-grid ny fametrahana ary asiana olika sy fitaovana fitehirizana herinaratra. Toy ny on-grid koa dia asiana safelika manohy mankany amin'ilay kaontera manisa ny herinaratra miditra sy mivoaka ahafahana mamantatra izay anjara nentin'ny fametrahana sôlara.

Misy fametrahana iray misy ifandraisana amin'ny tambazotra ihany koa saingy mifameno fotsiny ny herinatra entiny. Izany tokoa!! ny paika eto dia na (1) ny fametrahana sôlara no tena miasa ary mitondra izay tsy ampy ny tambazotra (amin'ny alina ohatra), na (2) ny tambazotra no tena miasa, fa ny fametrahana sôlara atao fiandry raha tapaka ny tambazotra. Tsy misy ilay tombontsoa ekônômika amin'ny fividianan'ny mpaninjara ny tambazotra eto ny fametrahana. 

Voambolana

fehibe: fehintany mizara ny bolantany ho ilany roa mitovy ()

tana : rayon

azimota: azimut

Fitodiky ny takelaka

Arakaraka ny toerana jeôgrafika, dia misy mpihazaka vitsivitsy momba ny fitodiky ny takelaka any amin'ny masoandro mba ahazoana izay tanjaka mafy indrindra azo raisina.  

1 - fitongilan’ny takelaka : ny zoro fitongilan'ny masoandro δ (solar declination angle) dia ny zoro eo amin'ny tanan'ny masoandro raisina amin'ny ivon'ny tany sy ny tanan'ny fehibe. Raisina ho miabo ny δ any amin'ny ila bolantany avaratra, ary miiba kosa aty amin'ny ila bolantany atsimo. Ny haambon'ny masoandro β (solar altitude) kosa dia ny zoro eo amin'ny tanan'ny masoandro amin'ny azimota voafaritra mihataka amin'ny azimotan'ny masoandro mitataovovonana. Ny zoro azimota ϕ (solar azimuth) dia ny zoro eo amin'ny tendrony atsimo raha any amin'ny ila bolantany avaratra (na avaratra raha aty amin'ny ila bolantany atsimo) sy ny azimotan'ny masoandro. Ireo no mamaritra ny fitodika sy ny fitongilan'ny takelaka, ary miova araka ny fotoana (ririninna, lohataona sns..). 

2 - angôvon'ny taratry ny masoandro (irradiance) : refesina amin'ny W/m2, ity angôvo ity dia mamaritra ny angôvo entin'ny taratry ny masoandro eo amin'ny faritra mirefy iray metatra tora-droa (takelaka ohatra). Azo tsoahina avy amin'io ny tanikandro (insolation izay refesina amin'ny W/m2/andro) izay mandrefy ny daniky ny masoandro eo amin'ny velarana iray mandritra ny fotoana voafaritra (ora ao anatin'ny iray andro). Miankina amin'izy ity ny velaran'ny takelaka ahazoana izay tanjaka ilaina.

3 - faharetan'ny taratry ny masoandro: ity dia manondro ny isan'ny ora manomboka tamin'ny fiposahan'ny masoandro mandram-pilentiny. Miovaova izy ity ka amin’ny ririnina ohatra dia fohy kokoa ny andro, izany hoe mihena ny fotoana ahazoan’ny takelaka taratra masoandro. Noho ny zoro fitongilan'ny masoandro (vao niposaka, mitatao vovonana, sy hilentika) dia miovaova koa ny angôvon'ny taratra voaray. Miankina amin'izy ity ny faharetan'ny famahanan'ny takelaka ny  bateria .